Zvicra legalizon martesat mes të njëjtës gjini

Pothuajse dy të tretat e votuesve zviceranë, kanë përkrahur martesën mes gjinisë së njëjtë, në një referendum të mbajtur këtë fundjavë.

Rreth 64% e votuesve kanë përkrahur propozimin. Kjo e bën Zvicrën një nga vendet e fundit në Evropën Perëndimore që legalizon martesën mes personave të gjinisë së njëjtë.

Pjesëtarë të fushatës për këto martesa kanë përshëndetur votimin, duke e konsideruar vendimin e ri një moment historik për të drejtat e komunitetit LGBT në këtë shtet.

Megjithatë, grupet e kishave dhe partitë politike konservatore e kanë kundërshtuar idenë, duke thënë se dëmton familjen tradicionale.

Zvicra u ka mundësuar çifteve të gjinisë së njëjtë që të regjistrojnë partneritetin që nga viti 2007, mirëpo disa të drejta kanë qenë të kufizuara.

Vendimi i ri i miratuar ua mundëson këtyre çifteve që të adoptojnë fëmijë.

Zvicra tani është kthyer në vendin e 30-të në botë që ka lejuar martesa të tilla.

Përgjatë 20 vjetëve të fundit, shumica e vendeve në Evropën Perëndimore kanë miratuar martesat e gjinisë së njëjtë.

LEXONI GJITHASHTU:

• Rajoni polak tërhiqet nga diskriminimi kundër LGBT pas humbjes së fondeve të BE