116 të vrarë nga përleshjet mes bandave në një burg të Ekuadorit

Katërqind policë të forcave speciale mësynë një burg në qytetin bregdetar të Guayaquilit në Ekuador pasi 116 të burgosur mbetën të vrarë nga një përleshje masive mes bandash.

Përleshja nisi të martën ndërsa autoriteteve iu desh rreth 24 orë për të rimarrë kontrollin e burgut. Sidoqoftë mëngjesin e së enjtes banorë të rrethinave u thanë mediave se dëgjuan shpërthime dhe të shtëna.

Pak pas raportimeve nga mediat, policia deklaroi zyrtarisht se kishte dërguar 400 forca të policisë për të siguruar rendin. Në profilin zyrtar Twitter, policia ekuadoriane botoi disa foto të forcave speciale teksa mësynin burgun “Litoral”.

URGENTE🚨#CmdtGralPolicía #GralTannyaVarela:

📍Alrededor de 400 servidores policiales realizan un operativo de intervención y requisa en el interior del #CPLGuayas No. 1, con el fin de mantener el orden y garantizar la seguridad en el centro carcelario

Operativo en desarrollo pic.twitter.com/NiQHjQkeO3

— Policía Ecuador (@PoliciaEcuador) September 30, 2021

Në këtë burg janë vendosur anëtarë të bandave famëkeqe të drogës si “Los Choneros”, me lidhje të forta me kartelin meksikan të Sinaloas. Kerteli rival i Sinaloas në Meksikë “Jalisco”, vitet e fundit ka trazuar grupe rivale në Ekuador me “Los Choneros” për të kontrolluar rrugët kryesore të narko-trafikut.

Autoritetet raportuan se përleshja e nisur të martën nuk kishte si synim thyerjen e burgut, por vetëm përplasjen mes bandave. Grupet rivale janë vendosur në anë të ndryshme të burgut, mirëpo sikurse u zbulua ata kishin hapur tunele ku kalonin nga ana në anë.

Mediat lokale raportojnë se përleshja masive mund të jetë porositur nga grupet jashtë madje dhe nga kartelet meksikane.

Ekuadori është një nga vendet me prodhimin më të lartë të kokainës. Vitet e fundit, me origjinë nga ky vend, janë kapur qindra kilogramë drogë edhe në Portin e Durrësit.