Përplasje BE-Britani, unioni kritikon Mbretërinë e Bashkuar për të drejtat e peshkimit

E drejta e peshkatarëve evropianë për të vepruar në ujërat territoriale britanike, sipas marrëveshjes së Brexit, është kthyer në mollën e sherrit mes BE-së dhe Mbretërisë së Bashkuar.

Komisioni Evropian deklaroi të enjten se i ka kërkuar llogari Londrës zyrtare në lidhje me refuzimin për lëshimin e licencave për peshkatarët francezë, që krahas ujërave britanike kanë të drejtë veprimi edhe në ishullin e Xhersit.

Një zëdhënëse e Komisionit, Vivian Loonela, deklaroi se Brukseli i vjen keq që numri i licencave të garantuara ishte shumë i kufizuar dhe që për momentin çështja është në ngërç.

“Jemi njohur me deklaratat e bëra nga qeveria britanike dhe autoritetet e ishullit të Xhersit në lidhje me çështjen e licencave për mjetet lundruese evropiane që mund të veprojnë në ujërat e tyre. Nga njëra anë, teksa mirëpresim njoftimet pozitive për lëshimin e disa licencave, na vjen keq që numri i tyre është i kufizuar dhe jo në nivelin që mund të zgjidhë problemin”, u shpreh Vivian Loonela.

Komisioni Evropian i bëri thirrje Mbretërisë së Bashkuar që të reagojë dhe garantoi se do të vijojë të angazhohet në proceset që janë në të mirë të peshkatarëve evropianë.

Aksesi i peshkatarëve të vendeve të BE-së në ujërat britanike ka qenë burim i një përplasjeje të hidhur gjatë negociatave post-Brexit dhe pavarësisht arritjes së Marrëveshjes për Bashkëpunimin Tregtar, ajo sërish mbetet një çështje e ndjeshme, me negociatat që janë ende në zhvillim.

LEXONI GJITHASHTU:

• Ç’po ndodh me krizën e naftës në Britani dhe radhët e gjata në pikat e karburantit?