Të paktën 20 të vdekur nga një tërmet në Pakistan

Një tërmet i fuqishëm në Pakistanin jugperëndimor vrau të paktën 20 persona dhe plagosi më shumë se 200 të tjerë të enjten në mëngjes.

Autoritetet e zonës thanë se numri i të vdekurve pritej të rritej ndërsa ekuipazhet kërkonin në zonën e largët malore.

Të paktën katër nga viktimat humbën jetën kur miniera e qymyrit në të cilën ata punonin u shemb. Rreth 100 shtëpi u shembën gjithashtu, duke zënë brenda banorët.

Epiqendra e tërmetit me magnitudë 5.9 ishte rreth 14 kilometra në veri-verilindje të Harnai në provincën Baluchistan, sipas Shërbimit Gjeologjik Amerikan. Matja fillestare e fuqisë së tërmetit ishte 5.7 ballë. Ai goditi rreth 20 kilometra nën sipërfaqen e Tokës (tërmetet më të cekët kanë tendencë të shkaktojnë më shumë dëme).

Zona, rreth 100 kilometra nga Quetta, kryeqyteti i provincës, është e mbushur me miniera qymyri, gjë që ka shqetësuar autoritetet se numri i viktimave nga tërmeti mund të rritet.

Kanalet televizive lokale treguan banorët e mbështjellë me batanije të ulur në anë të rrugës duke pritur që goditjet pas tërmetit të madh të qetësoheshin.

LEXONI GJITHASHTU:

• Një i vdekur dhe 9 të plagosur nga tërmeti i magnitudës 5.8 në Greqi
• Australia tronditet nga një tërmet i magnitudës 5.9
• Dëmet nga tërmeti i 26 nëntorit, asnjë monument kulturor i restauruar