Ndryshon situata në La Palma, hapet sërish aeroporti i ishullit

Njësitë e emergjencave pranë ushtrisë spanjolle kanë monitoruar në ditët e fundit cilësinë e ajrit në afërsi të vullkanit të ishullit La Palma.

Sipas të dhënave të fundit të autoriteteve lokale, situata është përmirësuar ditën e diel krahasuar me të shtunën dhe pritet të vijojë e tillë përgjatë gjithë ditës.

Përmirësimi i situatës ka bërë të mundur rihapjen e aeroportit të La Palmës, edhe pse shumë linja ajrore kanë anuluar tashmë fluturimet drejt ishullit.

Megjithatë, llava ka vijuar të derdhet përgjatë faqeve të malit edhe të dielën, duke bërë që re tymi të ngrihen në ajër.

Sipas shërbimit evropian të emergjencave “Copernicus”, që ka nisja e shpërthimit, më 19 shtator, vullkani ka shkatërruar rreth 1.150 banesa dhe shkrumbuar 480 hektarë tokë.

Ndërkohë, rreth 6 mijë persona janë evakuuar nga banesat e tyre. La Palma është pjesë e arqipelagut të ishujve Kanarie, që ndodhen në Atlantik e që ka 83 mijë banorë.