Emergjenca “energjetike” e tenderëve, KESH ble 1 mln euro pajisje, OSHEE e OST investojnë për mirëmbajtje

Një ditë para shpalljes së emergjencës energjetike, KESH shpenzoi 1 mln euro për blerje pajisjesh elektrike. Ndërkohë, OSHEE dhe OST kanë shpallur tenderë për mirëmbajtje softweri, kostoja e të cilave kalon 1.2 mln euro. Me vendim qeverie, këto shoqëri duhet të pezullojnë shpenzimet e panevojshme për të garantuar energji elektrike të pandërprerë.

Në datën 3 tetor, kryeministri Edi Rama njoftoi në një dalje të pazakontë për një krizë energjetike që ka prekur Shqipërinë, e që do të zgjasë disa muaj. Në emergjencë e sipër, qeveria shpalli brenda javës gjendjen e jashtëzakonshme, bashkë me planin për përballimin e situatës.

Në vendim, ajo detyron operatorët të shtrëngohen me shpenzimet, pasi do të nevojiten para për të blerë energji elektrike me çmim ta pazakontë. Por, 4 ditë pasi kryeministri ngriti alarmin, KESH shpenzoi 1 mln euro për blerje pajisjesh elektrike për Hidrocentralin e Komanit. Në të njëjtën ditë, OST shpalli të hapur garën për mirëmbajtjen e pajisjeve që menaxhon, duke vënë në dispozicion rreth 800 mijë euro.

Edhe OSHEE, kompania që ngarkohet me përgjegjësi direkte për të përballuar këtë krizë, prej 1 tetorit ka shpallur tender mirëmbajtjes software për fiskalizimin e faturave. Qeveria ka vendosur që deri në 15 prill të japë 200 mln euro garanci sovrane për këta operatorë, pasi gjendja e jashtëzakonshme e detyron të mbrojë familjet shqiptare nga kriza. Megjithatë, në këtë furtunë që na pret gjatë dimrit, edhe Bursa Shqiptare e Energjisë Elektrike Altax, po kërkon të rregullojë zyrat, duke vënë në dispozicion rreth 30 mijë euro.