Rritja e çmimeve, Gjokutaj: Qeveria të riformulojë buxhetin e 2022, duhet dëgjuar opozita dhe ekspertët

Eksperti i ekonomisë, Eduard Gjokutaj tha për Euronews Albania se qeveria duhet të reflektojë, në bashkëpunim me opozitën, ekspertë të ekonomisë dhe përfaqësues të biznesit për të riformuluar buxhetin e 2022.

Sipas tij, kjo është një nismë prioritare nisur nga situata kur rritja e çmimeve për disa produkte të shportës ka filluar të prekë xhepat e konsumatorëve.

“Opozita duhet të ndikojë, pasi është në parlament, aty ku nisin të gjenerojnë politikat e para që më pas zbresin në terren”, tha eksperti.

Rritja e borxhit publik në 80 për qind kur ende ka reforma të nisur që para 8 vjetësh ende të papërfunduara, është një barrë për brezat dhe ne që jetojmë sot, tha eksperti.

Sipas tij, rritja e mëtejshme e borxhit, e diktuar edhe nga kriza energjetike nuk e stimulon ekonominë, pasi çon në reduktimin e shpenzimeve për nevojat publike, që nga ndërtimi i shkollave deri tek ndihma sociale. Z. Gjokutaj e cilësoi të pajustifikuar tendencën për rritjen e çmimit të energjisë për biznesin e madh dhe të mesëm, pasi efektet sipas tij do të ndihen njësoj në ekonomi si në rastin e krizës së pandemisë.