Gazetaret e dhunuara në Evropë, Kiran Nazish: Arsyeja kryesore, pandëshkueshmëria e autorëve

Europa Lindore ka numrin më të madh të gazetareve të dhunuara, sipas organizatës “Koalicioni për Gratë në Gazetari”. Arsyeja themelore për këtë është pandëshkueshmëria e dhunuesve, thotë bashkëthemeluesja e kësaj organizate, Kiran Nazish.

Në një intervistë për Euronews Abania, Kiran Nazish tha se personat që ushtrojnë dhunë fizike ndaj grave gazetare, që në disa raste janë vetë policët, duhet të mbajnë përgjegjësi për veprimin e tyre. Znj. Nazish tha se deri tani, në rastet më të shumta nuk kryhet hetim për të gjetur autorët.

“Mendoj se për shkak të mos mbajtjes së përgjegjësisë të atyre që dhunojnë fizikisht një gazetare apo kur policia dhunon gabimisht gazetarët që nuk duhet t’i prekë në një demokraci ligjore, ose kur një gazetare plagoset apo edhe vritet, nuk kryhet asnjë hetim për të gjetur autorin”, u shpreh Kiran Nazish.

Sipas Kiran Nazish, një nga gjërat parësore që qeveritë evropiane duhet të bëjnë për të parandaluar dhunën ndaj gazetareve është të kuptojnë se Evropa është rajoni i demokracisë, lirisë dhe barazisë. Për këtë, ajo tha se çdo lider apo qeveri, duhet të rimendojnë se çfarë mund të bëjnë që demokracitë e tyre të jenë më të sigurta për gazetarët.

“Pa gazetari të lirë, pa liri të shprehjes, pa mbrojtur gazetarët nga dhuna nuk mund të kesh vlera demokratike dhe institucione të qëndrueshme demokratike. Nuk mund të kesh rritje ekonomike kur një nga shtyllat e demokracisë, që është gazetaria, targetohet në këtë mënyrë”, u shpreh znj. Nazish.

LEXONI GJITHASHTU:

• Koalicioni për Gratë në Gazetari i shqetësuar për dhunën ndaj gazetareve