5,2 mld dollarë për buxhetin e vitit 2022, qeveria pret rritje ekonomike 4.1 për qind

Buxheti për vitin 2022 do të jetë 5.2 mld dollarë, me rritje 10.6% në krahasim me këtë vit. Ndërkohë, edhe shpenzimet do të rriten në 6.2 mld dollarë. Me këto shifra, pritet që deficiti të arrijë 1 mld dollarë, ose 5.4 % e PBB-së.

Burimi i rritjes së të ardhurave shihet tek rimëkëmbja ekonomike, rritja e volumit të importeve dhe lufta ndaj informalitetit. Qeveria shqiptare pret që rritja ekonomike vitin e ardhshëm të jetë 4.1%.

Në dokumentin e buxhetit, i prezantuar nga ministrja e Financave dhe Ekonomise, Delinda Ibrahimaj, stoku i borxhit publik vlerësohet të arrijë në 14.1 mld dollarë dhe nga 80% që do të jetë këtë vit, synohet të ulet me 1.1 pikë përqindje (78.9%).

Një fond i posaçëm parashikohet edhe për rritje pagash, i cili do të bëhet aktiv nga muaji korrik dhe përfitues do të jenë kryesisht mjekët e arsimtarët.

Ndërkohë, janë 190 milionë dollarë të papërdorura nga fondi i rindërtimit, që do të financojnë projekte të mbetura pezull në vite.

Sa i përket administratës, ajo do të shtohet me 330 punonjës.