Biden vizitë në Itali për G20, takon për herë të parë Macron pas ‘krizës’

Presidenti amerikan Joe Biden mbërriti të premten në Itali, në kuadër të samitit të vendeve anëtare të grupimit G20.

Takimi i parë i tij ishte me Papa Françeskun në Vatikan, në një kohë kur në Shtetet e Bashkuara janë ndezur debatet mbi qëndrimin e presidentit katolik në mbështetje të të drejtave të abortit.

Selia e Shenjtë bëri të ditur se takimi kokë më kokë zgjati një orë e 15 minuta dhe më pas 15 minuta të tjera për të bërë foto dhe për të shkëmbyer dhuratat, në prani edhe të delegacioneve përkatëse.

Ndërkohë, takimi i mëparshëm me presidentin Trump në 2017-n zgjati vetëm 30 minuta, ndërsa ai me Barack Obama në vitin 2014 rreth 50 minuta.

Gjatë takimit, Biden i tha atit të shenjtë se ai ishte luftëtari më i madh për paqen që kishte pare ndonjëherë.

Pas kësaj ai i dhuroi Papës një monedhë.

“Nuk e di nëse është e përshtatshme, por në Amerikë kemi një traditë, që presidenti ka të ashtuquajturën monedha e udhëheqjes, të cilën ua jep luftëtarëve dhe liderëve dhe ju jeni luftëtari më i madh për paqen që kam takuar ndonjëherë”, tha Biden.

Në kuadër të vizitës, Biden u takua edhe me kryeministrin e Italisë, Mario Draghi, si dhe me presidentin Sergio Mattarella. Klima, pandemia dhe bashkëpunimi mes Shteteve të Bashkuara dhe BE-së.

Në këtë aspekt, liderët italianë vlerësuan “kthimin e Amerikës”, siç e ka quajtur presidenti Biden riaktivizimin e Uashingtonit në politikën e jashtme, pas asaj “Amerika e Para”, e paraardhësit të tij Donald Trump.

Biden është takuar gjithashtu me homologun francez Emmanuel Macron, takimi i parë ky që nga nënshkrimi i marrëveshjes AUKUS, që ftohu marrëdhëniet mes Francës dhe Shteteve të Bashkuara, Britanisë dhe Australisë.