Parlamenti miraton murin kundër emigrantëve në Poloni

Ligjvënësit në Poloni miratuan ndërtimin e shpejtë të murit në kufi me Bjellorusinë, me qëllim ndalimin e fluksit të emigrantëve.

Tani, plani i propozuar nga qeveria e qendrës së djathtë duhet të miratohet nga presidenti Andrzej Duda, një aleat i qeverisë.

Ndërtimi i murit me vlerë 402 milionë dollarë do të nisë menjëherë pas aprovimit.

Polonia dhe vendet e tjera të BE-së akuzojnë regjimin bjellorus të presidentit Alexader Lukashenko se po inkurajon dhe ndihmon emigrantët nga Lindja e Mesme dhe Afrika që të tentojnë hyrjen në BE përmes kufijve të saj.

Sipas Brukselit, qeveria në Minsk po përpiqet të destabilizojë të tërë bllokun në shenjë hakmarrjeje për sanksionet e Perëndimit.

Disa emigrantë, kryesisht nga Iraku dhe Siria, kanë vdekur si pasojë e lodhjes në afërsi të kufirit polak, pasi përshkuan mbi 400 km nëpër pyje, moçale dhe lumin Bug.

Polonia ka ndërtuar një gardh me tela me gjemba dhe ka dërguar disa mijëra trupa të gardës, ushtrisë dhe policisë, por masat nuk e kanë ndalur dot fluksin e emigrantëve.

Rojet kufitare kanë kthyer mbrapsht emigrantët, përfshirë disa familje me fëmijë dhe një ligj i ri polak legalizon këtë veprim.

LEXONI GJITHASHTU: 

• Gjermania shton forcat policore në kufirin me Poloninë
• Vijon kriza e emigrantëve në kufirin Poloni-Bjellorusi, lëndohen dy ushtarë
• BE gjobit Poloninë, Varshava do paguajë 1 milion euro në ditë për shkelje të ligjit