Taksat e vitit 2022, preket tatimi mbi pagat, akciza e gazit dhe TVSH-ja në bujqësi

Viti i ardhshëm do të vijë me një sërë ndryshimesh në paketën fiskale. Pagat, qumështi pluhur dhe gazi, nga janari do të taksohen me norma të reja.

Ministrja e Financave Delina Ibrahimaj ka prezantuar në Komisionit Ekonomisë 4 projektligje, ku fillimisht u ndal tek rishikimi i tatimit mbi pagat.

“Rritet paga dysheme e pa tatueshme, nga niveli 30 mijë lekë në nivelin 40 mijë lekë në muaj. Për këtë interval pagash tatimi që do të paguhet mbi të ardhurat nga paga është 0%. Nga kjo përfitojnë rreth 71 mijë e 500 qytetarë në masën totale prej 557 milionë lekësh në vit. Tatimi 23% parashikohet të fillohet të aplikohet mbi pagat mbi 200 mijë lekë në muaj  nga 150 mijë lekë në muaj që është aktualisht”, tha ministrja.

Në bujqësi propozohet të hiqet kompensimi 6% për fermerët, ndërsa Për të mbrojtur prodhimin vendas është menduar të vendoset një taksë importi për qumështin pluhur.

“Projektligji parashikon vendosjen e një takse 100 lekë për kilogram për importet e prodhimit të qumështit pluhur”, tha Delina Ibrahimaj.

Ndërkaq, qeveria shqiptare propozon unifikimin e akcizës për gazin e makinave dhe gazin që përdoret për qëllime të tjera, në nivelin 6 lekë për litër.

Aktualisht, niveli i akcizës për këtë nënprodukt është 8 lekë litri, nëse përdoret si lëndë djegëse për automjetet dhe 0 lekë litri, për sasinë që shfrytëzohet nga konsumatorët e tjerë.

LEXONI GJITHASHTU: 

• Paketa e taksave 2022, rishikohet pragu i TVSH, tatimi mbi pagat e akciza