Rrëfehet Lukashenko, presidenti bjellorus pranon ndihmën për emigrantët në kufi

Presidenti i Bjellorusisë, Aleksander Lukashenko nuk e ka përjashtuar mundësinë që trupat e tij të kenë ndihmuar emigrantët të kalojnë kufirin për në Poloni.

Megjithatë, në një intervistë për BBC, ai ka mohuar që t’i ketë thirrur posaçërisht emigrantët në vendin e tij.

“Ndihma për të kaluar kufirin është e mundur. Ne kemi zemër. Trupat tona e dinë që emigrantët duan të shkojnë në Gjermani. Ndoshta dikush i ka ndihmuar”, – ka deklaruar Lukashenko.

Lideri autoritar ka nënvizuar se ia ka bërë të qartë BE-së se as do t’i arrestojë dhe as do t’i ndalojë emigrantët, pasi ata duan të shkojnë drejt Unionit dhe jo të qëndrojnë në vendin e tij.

Lukashenko është në pushtet që prej vitit 1994, por rizgjedhja e tij në krye të shtetit në gusht të 2020-s u kritikua nga Perëndimi dhe nuk u njoh nga Bashkimi Evropian.

Ai është akuzuar nga Unioni se ka orkestruar krizën migratore në kufi me Poloninë, Lituaninë dhe Letoninë në muajt e fundit, si hakmarrje për sanksionet e vendosura për dorën e hekurt të përdorur ndaj protestuesve që kontestonin pikërisht rizgjedhjen e tij.

Si pasojë e ofensivës shtetërore, disa mijëra protestues dhe aktivistë u arrestuan dhe liderja e opozitës bjelloruse, Svetlana Tikhanovskaya u detyrua të largohej nga vendi pasi shpalli fitoren.

Ekipi i saj kritikoi BBC për intervistën, duke deklaruar se “i shtroi tapetin e kuq diktatorit”.