Protesta e artistëve holandezë kundër masave anti-COVID kthen muzeun në parukeri

Artistët dhe punonjësit e muzeve protestuan në një mënyrë shumë të veçantë për të kundërshtuar masat strikte ndaj COVID-19, që nuk i lejojnë të ushtrojnë lirshëm aktivitetin e tyre.

Në ditë normale këtu do të kishte vepra artistike, piktura, statuja apo edhe koncerte por sot ka klientë të cilët presin flokët, rregullojnë thonjtë, bëjnë palestër apo joga. Sallat e koncerteve u shndërruan në qendra estetike të përkohshme. Por me një ndryshim; ke fatin të dëgjosh muzikë të luajtur nga një orkestër profesioniste.

Nuk jemi në një qendër estetike por jemi në ambientet e muzeut Van Gogh që ndodhet në Amsterdam.

“Ne po e organizojmë këtë për të theksuar sepse mendojmë se sektori i kulturës duhet të jetë i hapur. Muzetë në veçanti janë një vend shumë i sigurt për t’u vizituar. Ka shumë hapësirë, ajër të pastër. Thjesht nuk e kuptojmë pse jemi të mbyllur dhe një sallon bukurie është i hapur”, shprehet Emilie Gordenker drejtoreshë e muzeut ‘Van Gogh’.

50 vizitorë mirëpritën seancën e prerjes së flokëve. Ata mbanin maska dhe distancën, ndërsa në hyrje kontrolluan për certifikatat e COVID që tregonin nëse janë vaksinuar ose shëruar.

Muzetë e famshëm në të gjithë Holandën, nga Van Gogh në Amsterdam e deri te Frans Hals në Haarlem, hapën dyert e tyre duke rrezikuar të gjobiten.

Në një postim në Twitter, ministri i Kulturës shprehu mirëkuptim për protestën, por kërkoi kujdes.

Holanda lehtësoi disa masa fundjavën e kaluar, duke lejuar që palestrat, sallonet e bukurisë dhe dyqanet të rihapen. Por vendet kulturore u urdhëruan të qëndrojnë të mbyllura për publikun të paktën deri më 25 janar.