Përse po bie borë në shkretëtirën e Saharasë?

Nëpër rrjete sociale qarkulluan këtë javë pamje ku duket shkretëtira e Saharasë e veshur me dëborë.

Të gjithë e dimë se Saharaja është një prej vendeve me më shumë thatësirë në botë me temperatura të larta që arrijnë deri në 50 gradë Celsius. Së bashku me Luginën e Vdekjes në Kaliforni dhe disa qyteteve pranë ekuatorit si Daloli në Etiopi dhe Vadi Halfa në Sudan, janë disa prej pikave më të nxehta në tokë.

Shkretëtira me përmasa gjigande shtrihet përgjatë 11 shteteve: Algjeri, Çad, Egjipt, Libi, Mali, Mauritani, Marok, Niger, Sahara Perëndimore, Sudan dhe Tunizi. Kodrat e rërës arrijnë deri në 180 metra ndërsa uji gjendet me pakicë.

Ndaj jo më kot shumë u befasuan kur panë kodrat e rërës të veshura me një vello të bardhë.

 

View this post on Instagram

 

A post shared by Karim Bouchetata (@karim_bouchetat)

Ku janë shkrepur fotografitë dhe çfarë tregojnë?

Në pamjet e fotografuara më herët gjatë janarit nga fotografi Karim Bouchetata është qyteti Ain Sefra i mbuluar me dëborë, i cili ndodhet në veriperëndim të Algjerisë.

Herët e tjera që kanë rënë dëborë në këtë rajon janë në 1979, 2017, 2018 dhe 2021.

 

View this post on Instagram

 

A post shared by Karim Bouchetata (@karim_bouchetat)

Ain Sefra shtrihet në malet e Atlasit, 1 mijë metra mbi nivelin e detit dhe njihet ndryshe si ‘porta drejt shkretëtirës’, fare pranë kufirit me Marokun.

Në momentin që janë shkrepur fotografitë, temperaturat shënonin -2 gradë Celsius.

 

View this post on Instagram

 

A post shared by Karim Bouchetata (@karim_bouchetat)

A po ndikojnë ndryshimet klimatike?

Reshjet e borës janë një fenomen tejet i rrallë në shkretëtirë për shkak së mungesës së ujit në ajër, edhe pse në orët e mbrëmjes temperaturat bien ndjeshëm.

Kriza klimatike është e paparashikueshme, me temperatura të larta rekord në disa shtete të Afrikës, e acare të pazakonta në skajin tjetër.

Sipas një studimi shkencor, i ftohti ekstrem mund të jetë si rrjedhojë e ngrohjes së Arktikut. Edhe pse studimi u krye në Shtetet e Bashkuara, ai parashikon se valët e të ftohtit do të vijnë duke e shtuar në mbarë botën si pasojë e ngrohjes globale.

Rezultatet e studimit nënvizojnë një ‘tjetër arsye pse duhen reduktuar me shpejtësi emetimet e gazrave serë që po shtyjnë ngrohjen globale’. sipas Forumit Ekonomik Botëror.

Vlen të theksohet se ndryshimet klimatike të shkaktuara nga dora e njeriut kanë sjellë dhe një zmadhim të shkretëtirës së Saharasë. Sot, sipërfaqja e shkretëtirës është rreth 10 për qind më e madhe nga sa ishte një shekull më parë.

Shkretëtira përkufizohet si një vend në tokë ku reshjet e shiut nuk i tejkalojnë 25 centimetra në vit, sipas agjencisë shkencore amerikane “US Geological Survey”. Thënë kjo, nëse Saharaja vijon e zmadhohet, vendet përreth kanë më shumë të ngjarë që të përfshihen nga thatësira.