Kryeministri britanik do zotohet për mbështetje ndaj Ukrainës

Të martën, kryeministri britanik Boris Johnson do të zotohet në mbështetje të sovranitetit të Ukrainës gjatë një vizite në Kiev.

Kjo vizitë vjen si pjesë e përpjekjeve diplomatike të Perëndimit për të ndaluar një pushtim të mundshëm rus, për të cilin Moska thotë se nuk ka asnjë provë se po e planifikon.

Shtetet e Bashkuara kanë deklaruar se janë në diskutime aktive me aleatët dhe kanë vendosur rreth 8.500 forca në gatishmëri në Europë.

Nga ana tjetër Rusia, e cila pushtoi Krimenë nga Ukraina në vitin 2014 dhe mbështet separatistët në lindje të vendit, po kërkon garanci sigurie duke përfshirë një premtim që NATO nuk do ta pranojë kurrë Kievin.

Tensionet u shfaqën në Këshillin e Sigurimit të Kombeve të Bashkuara të hënën lidhur me grumbullimin e trupave pranë Ukrainës, pasi Rusia dhe Shtetet e Bashkuara përdorën forumin ndërkombëtar për të etiketuar njëra-tjetrën si “provokuese”.

LEXONI GJITHASHTU:

• Debat për Ukrainën në OKB, SHBA: Do reagojmë në rast pushtimi