Zvicra kërkon përmirësim të marrëdhënieve me BE-në

Presidenti i Zvicrës, Ignazio Cassis, dëshiron të përmirësojë marrëdhëniet me Bashkimin Evropian.

“Besoj se Zvicra duhet të afrohet më pranë bllokut evropian”, tha Cassis të dielën për gazetën SonntagsZeitung.

Për këtë, ai kërkoi një paketë të re marrëveshjesh dypalëshe.

Cassis, i cili po mban edhe postin e ministrit të Jashtëm, tha se Qeveria zvicerane po punon për bisedime të reja me BE-në.

“Në Këshillin Federal ne aktualisht jemi në proces të projektimit të kornizës për një paketë të mundshme, apo për një agjendë bisedimesh”, tha ai.

Cassis tha se raport Zvicër – BE mund të thellohen përmes marrëveshjeve për energjinë dhe elektricitetin, si dhe në fushën e shëndetësisë, kërkimeve, medias dhe kulturës.

“Marrëdhëniet e paqëndrueshme nuk janë një zgjidhje afatgjatë, as për ne, as për BE-në”, theksoi Cassis.

Rreth 1.4 milionë qytetarë të BE-së jetojnë në Zvicër, e cila është partneri i katërt më i madh tregtar i BE-së.

Vite bisedimesh që kishin për qëllim ta afronin Zvicrën më pranë tregut të përbashkët të BE-së dështuan majin e vitit të kaluar, kur Qeveria zvicerane hoqi dorë nga një draft-traktat i vitit 2018, që kishte për qëllim të forconte lidhjet tregtare.