Shitja e armatimeve në Tajvan tensionon raportet SHBA-Kinë

SHBA ka aprovuar shitjen e pajisjeve ushtarake në vlerë prej 100 milionë dollarësh drejt Tajvanit.

Shtetet e Bashkuara thanë se këto pajisje ushtarakje kanë qëllim “mirëmbajtjen dhe përmirësimin të sistemit mbrojtës raketor”.

Si pasojë, raportet mes Shteteve te Bashkuara dhe Kinës janë tensionuar pasi Ministria e Jashtme kineze dënoi planet e SHBA-ve për t’i shitur armë Tajvanit.

Kina tha se e sheh lëvizjen si një cenim të sovranitetit dhe sigurisë së vendit.

Zëdhënësi i Ministrisë së Jashtme të Kinës, Zhao Lijian u shpreh se Kina do të marrë masa për të ruajtur interesat e sigurisë kombëtare.

“Kina i kërkon SHBA-së që t’i përmbahet parimit të 3 marrëveshjeve të përbashkëta kino-amerikane, dhe të ndalojë shitjen e armëve në Tajvan dhe të ndërpresë lidhjet ushtarake me Tajvanin. Kina do të marrë masa legjitime dhe të menjëhershme për të mbrojtur me vendosmëri sovranitetin e vet dhe interesat e sigurisë kombëtare”, tha Zhao Lijian, raporton agjencia e lajmeve Reuters.

Në një deklarate për mediat ministria e Jashtme e Tajvanit bëri të ditur se mirëpriste vendimin e kongresit amerikan.

Tensionet në Ngushticën e Tajvanit, zonë që ndan ishullin nga Kina, janë rritur në vitet e fundit, pasi Pekini vazhdimisht çon aeroplanë në zonën ajrore tajvaneze dhe zhvillon stërvitje ushtarake afër ishullit.

Pekini konsideron që Tajvani është pjesë e Kinës dhe “ribashkimi” me këtë ishull është kthyer në çështje të rëndësishme për presidentin kinez.

LEXONI GJITHASHTU: 

• Kinë – Rusi bashkojnë forcat kundër zgjerimit të NATO-s