Parku arkeologjik romak Pompei kthehet në ditët e lavdisë pas rihapjes

Pompei, qyteti i lavdishëm antik romak që u gropos në një shpërthim të vullkanit Vezuvi në vitin 79 pas Krishtit dhe më vonë i zbuluar, është gati të ngrihet përsëri, kësaj radhe jo nga qilimi i trashë i hirit, por nga katastrofa e pandemisë së coronavirusit. Zona e vjetër arkeologjike u rihap për turistët këtë të martë pas një mbylljeje prej më shumë se dy muaj e gjysmë, që ndali ekonominë vendase pothuajse njësoj si shpërthimi i gati 2,000 vjet më parë ngriu qytetin në kohë.

Autoritetet kanë skicat e tyre në mënyrë që vizitorët, të cilët do të duhet të mbajnë maska, të respektojnë distanca të sigurta sociale dhe të shmangin grumbullimin. Drejtori i parkut arkeologjik, MASSIMO OSANNA thotë se kjo rihapje do të sjellë surpriza për turistët të cilët kapin shifrat e 2 milionë vizitorëve në vit.

“Kjo mbyllje ka qenë një rast për ne që të rimendojmë itineraret dhe t’i ribëjmë ato. Edhe ata që kanë qenë njëherë në Pompei, duhet të kthehen sërish, sepse do të ketë hapje të ambienteve që nuk janë parë kurrë më parë, kopshte të hapura, rrugë të reja, e për më tepër është një rast i shkëlqyer për ta parë parkun ku rrugët nuk gëlojnë nga turistët.

Dyzet njerëz lejohen të hyjnë në një grup, çdo 15 minuta. Por në ditën e rihapjes vetëm pak persona endeshin nëpër rrënojat e lashta duke u mrekulluar nga muret e brishta, që megjithatë kanë qenë të aftë të ruajnë afresket dhe tempujt që datojnë mijëra vjet.

Pompei ishte shtëpia e rreth 13,000 njerëzve kur u varros nën hi, guralecë dhe pluhur kur forca e një shpërthimi të barabartë me fuqinë e disa bombave atomike i kaloi sipër. Qyteti u rizbulua më 1748 nga një grup kërkuesish që po gërmonin për të gjetur objekte të lashta.