Pasojat e COVID-19, aktiviteti ekonomik në SHBA kontraktohet me 5%

Aktiviteti ekonomik në Shtetet e Bashkuara u kontraktua me 5 për qind në tremujorin e parë të vitit, bëri të ditur Departamenti i Tregtisë. Bëhet fjalë për rënien më të madhe të GDP-së amerikane që prej vitit 2009, e konstatuar në një proces rishikimi të situatës.

Urdhri për të qëndruar në shtëpi i dhënë në mars dhe masa të tjera për t’iu përgjigjur epidemisë së COVID-19 çoi në ndryshime të shpejta të kërkesës, teksa bizneset dhe shkollat kaluan në versionin e punës në distancë, ose anuluan operacionet e tyre; pa harruar konsumatorët që anuluan shumë plane ose ndryshuan drejtimin e shpenzimeve.

Rënia e GDP-së në tremujorin e parë reflektoi gjithashtu kontributet negative që rrjedhin nga investimet private dhe eksportet që u mënjanuan pjesërisht nga investimet e brendshme, tregon një raport i qeverisë federale.

Në tremujorin e katërt të 2019-s, GDP-ja ishte rritur me 2.1 për qind. Ndërkohë, kuota fillestare e papunësisë në Shtetet e Bashkuara arriti në 2.1 milionë javën e kaluar, teksa COVID-19 vazhdon të përfshijë vendin.

Në javën që i parapriu 23 majit, numri i amerikanëve që aplikuan për përfitimet e papunësisë ra me 323 mijë krahasuar me javën paraardhëse, duke arritur në 2 milionë e 123 mijë e duke rënë njëkohësisht për të tetën javë rresht.