Pasojat e COVID, spanjollët ushqim me bamirësi

Qeveria spanjolle po i heq me ngadalë masat kufizuese. Në të njëjtën kohë, ajo po përpiqet të riaktivizojë ekonominë, për të cilën kryeministri Pedro Sanchez ka deklaruar se do të tkurret me 9 për qind këtë vit dhe do të duhen 2 vite për t’u rikuperuar.

Në qytetet kryesore radhë të gjata verifikohen në ato që njihen si bankat e ushqimit. Ata që punojnë në të zezë, pa kontrata, janë njerëzit që vuajnë më shumë pasojat ekonomike të pandemisë.

“Për shkak të koronavirusit kam mbetur pa punë. Ekonomia po e bën të vështirë sigurimin e ushqimit”, thotë Emma Lopez Garcia, me profesion kujdestare familjare.

Problemi është global, me shoqatat e bamirësisë që thonë se kriza ekonomike e shkaktuar nga pandemia mund të fusë 500 milionë njerëz në varfëri.

Në Spanjë, bllokada ka goditur rëndë ekonominë, që kishte një nga kuotat më të larta të papunësisë në eurozonë, e dyta pas Greqisë.