Firence, kohë të vështira për artizanët. Zanatçinjtë vuajnë pasojat e bllokadës

Firence, një prej qyteteve më të njohura për artin në botë, duket e shkretë këto ditë. Ajo shfaqet e boshatisur dhe e qetë, ndërkohë që në kohë normale mijëra turistë shëtisin nga njëri monument në tjetrin.

Dyqanet e zanatçinjve përbëjnë jo vetëm pjesën kyçe të ekonomisë së qytetit, por janë dhe trashëgimi kulturore. Bllokada thuajse 3-mujore ka goditur rëndë këtë biznes.

Por artizanët kanë vuajtur edhe përpara pandemisë së koronavirusit. Rreth 180 mijë biznese artizanale u mbyllën në dekadën e fundit dhe disa mijëra të tjera janë në prag falimentimi. Zanatet e vjetra janë në rrezik zhdukjeje, sikurse një dyqan kornizash në qendër të qytetit.

“Disa dyqane nuk do të hapen sepse nuk ka turistë. Këto biznese duhet të paguajnë mijëra euro për qiranë ose hipotekën, kanë punonjës dhe duke mos pasur turizëm zgjedhin të rrinë më mirë mbyllur dhe të shtyjnë hapjen në të ardhmen”, thotë Gabriele Maselli, pronar i dyqanit.

Dyqanet e artizanëve në Firence janë biznese historike të kaluara nga brezi në brez. Ato bartin memorjen e këtij qyteti dhe trashëgiminë kulturore të tij.

“Njerëzit vijnë këtu për t’u njohur. Ushqimi dhe vera janë mjete komunikimi. Për fat të keq, në këto kohë të jashtëzakonshme, qëllimi i këtij biznesi është inekzistent”, shprehet Gianni Migliorini, tregtar vere.

Ajo e Urës së Vjetër është një zonë e vogël por historike për argjendarët. Ata kanë zgjedhur të qëndrojnë mbyllur sepse ndihen të braktisur nga qeveria.

Një ndjesi shqetësimi dhe pasigurie dominon rrugët e boshatisura të qytetit. Zanatçinjtë presin ditë më të mirë dhe shpresojnë se bukuria e Firences do të mbizotërojë.