Rusia ‘hakmerret’ ndaj SHBA-ve: Respektoni të drejtën e qytetarëve për të protestuar

Rusia shpesh herë kritikohet dhe është në qendër të vëmendjes nga organizatat ndërkombëtare apo edhe nga shumë shtete për mos respektim të të drejtave të njeriut.

Por këtë herë është Rusia ajo që kthen monedhën dhe kritikon Shtetet e Bashkuara të Amerikës.

Ministria e Jashtme ruse iu bëri thirrje autoriteteve amerikane të respektojnë të drejtën e amerikanëve për të zhvilluar protesta paqësore  nisur nga ngjarjet e fundit në shumë qytetet amerikanë të pushtuara nga demonstrimet pas vrasjes së afro amerikanit George Floyd.

Zëdhënësja e ministrisë, Maria Zakharova, u shpreh se Moska ka parë më vëmendje dhe do të marrë parasysh të gjitha rastet kur është përdorur gazlotjellës për të shpërndarë protestuesit apo edhe të gjitha rastet e arrestimeve masive gjatë zhvillimit të protestave në SHBA.

Ajo gjithashtu theksoi se gazetarë të shumtë, përfshirë reporterë rusë, ishin lënduar gjatë raportimit të tyre në terren.

“Ka ardhur koha që SHBA-të t’i japin fund rolit të mentorit dhe të shohin veten në pasqyrë, të nisin të respektojnë të drejtat e njerëzve dhe të vëzhgojnë e zbatojnë standardet e tyre demokratike”, thuhet në deklaratë

Mes tensioneve që ngrihen herë pas here mes dy shteteve, Moska prej kohësh kritikon Uashingtonin për qëndrimin e tij se Rusia ka probleme me respektimin e të drejtave.