Madridi zgjohet në fazën II, bizneset të pakënaqura, presin fazën e ardhshme

Kufizimet e vendosura në kuadër të bllokadës së koronavirusit u lehtësuan më tej të hënën në Madrid. Nga dita e sotme, klientët lejohen të konsumojnë vakte në bare dhe restorante dhe jo vetëm në ambientet e jashtme.

Ndërsa fëmijët lejohen të luajnë jashtë shtëpive në çdo orë të ditës dhe jo vetëm në atë të përcaktuar më herët nga autoritetet.

Por Cesar Alonso, pronar i një bari pranë zonës Las Ventas, ku ndodhet stadiumi i ndeshjeve me dema, deklaron se nuk do të hapë dyert derisa të hyjë në fazën e ardhshme, pasi kufizimet në fazën e dytë nuk i mundësojnë biznesit të tij që të fitojë.

“Problemi që kam unë gjatë fazës së dytë është se kam vetëm 6 tavolina në ambient të hapur dhe mund të shfrytëzoj 50 ose 40 për qind të tyre. Pra, 3 tavolina. Nuk mund të kthej në punë personelin për vetëm 3 tavolina, ndaj kam vendosur të qëndroj i mbyllur dhe në të ardhmen, shpresoj javës tjetër, të hapemi 100 për qind”, shprehet Alonso.

Por qytetarë të tjerë duken të kënaqur me vijimin e lehtësimeve.

“Pak nga pak po fitojmë më shumë liri, sidomos restorantet që mund të zgjerojnë ambientet e jashtme, por dhe 30 për qind e atyre që mund të punojnë brenda. Pra, pak nga pak po intensifikojmë aktivitetet dhe po kthehemi në normalitet”, thotë Cristina Fiestas, avokate.

Ndërkohë, ndeshjet e demave nisin në këtë fazë, por me kapacitete të reduktuara, me rreth 400 spektatorë.

Spanja nuk do të fillojë rihapjen e kufijve për turistët e huaj përpara 1 korrikut, ndërsa po kërkon një qëndrim unik evropian mbi sigurinë e udhëtimeve.