Shqipëria prodhon 40% më pak energji elektrike

Vendi ynë prodhoi 40% më pak energji elektrike këtë fillim vit, krahasuar me 3-mujorin e parë 2021. Shkak është bërë thatësira, ndërsa në ditët e ftohta të janarit familjet rritën përdorimin e energjisë.

Për shkak të thatësirës qe përfshiu vendin tre muajt e parë të vitit vendi ynë, prodhoi 40% me pak energji në krahasim me të njëjtën periudhë të 2021.

Si pasojë, Shqipëria u detyrua të rrisë sasinë e energjisë të importuar nga tregu i huaj.

Në tre muajt e parë të vitit, sipas INSTAT, importi i energjisë ishte 7 herë më i lartë se vitin e kaluar. Prej prodhimit të paktë, ra edhe sasia e energjisë së eksportuar me 67 %.

Ndërkohë, gjatë periudhës janar-mars ka pasur një përdorim më të madh të energjisë elektrike, e lidhur kryesisht me ditët e ftohta.

Përdorimi i energjisë elektrike nga konsumatorët, arriti vlerën 1770 GWh nga 1680 GWh që ishte në tremujorin e parë të vitit 2021.

Rritja më e madhe është matur tek familjarët, të me 8.1%, ndërsa tek bizneset, konsumi u rrit me 2.9%. Të dhënat i referohen një periudhë emergjence energjetike, ku çmimet janë 5-fishuar në krahasim me vitin e kaluar.