Spanjë, Sanchez mbledh kabinetin për herë të parë që nga bllokada

Kryeministri spanjoll Pedro Sanchez dhe ministrat e tij zhvilluan të martën mbledhjen e parë kokë më kokë që nga vendosja e bllokadës për të luftuar epideminë e koronavirusit, më 14 mars.

Spanja, që ka qenë një nga vendet më të prekura nga pandemia, vendosi masa të rrepta kufizuese në mars, por filloi gradualisht lehtësimin e tyre në muajin maj, me rajone të ndryshme që kanë hyrë në faza të ndryshme.

Përpara mbledhjes së kabinetit u mbajt një minutë heshtje në nder të viktimave të virusit.

Të hënën, më 8 qershor, Spanja raportoi 48 raste të reja me COVID-19. Kuota totale e të prekurve që nga rënia e epidemisë deri më 8 qershor rezulton 241 mijë e 717, ndërsa ajo e të vdekurve 27 mijë e 136 njësi.

Infeksionet ditore dhe vdekjet nga koronavirusi kanë rënë që prej periudhës së pikut që u verifikua në prill, por në spitale ka mungesë pajisjesh mjekësore. Një ngarkesë me mallra nga Kina pritet të mbërrijë në vend nga fundi i qershorit.

Ndërkohë, vetë spanjollët kanë shpresë se ekonomia e vendit do të ringrihet teksa rregullat e bllokadës po zbuten dita ditës.

Pronarët e bareve në Madrid shpresojnë të rrisin klientelën e tyre pasi masa që ndalonte shërbimin në ambient të mbyllur u hoq ditën e hënë.

“Siç mund ta shihni, brenda nuk ka shumë njerëz dhe nuk kemi siguri që do të ketë një fluks njerëzish si më parë, por e kemi marrë shtruar dhe me qetësi po i përshtatemi situatës së re”, shprehet Juan Pablo Iniguez, menaxher kafeneje.

Klubet e natës u hapën gjithashtu në pjesën dërrmuese të Spanjës, edhe pse një masë ndalimi për vallëzimin do të hyjë në fuqi për të parandaluar infeksionet.