Protestat nuk ndalen. Siatëll, kërkohet reformimi i policisë

Disa qindra protestues mbushën sheshin para bashkisë së qytetit të Siatëllit, në Shtetet e Bashkuara, duke kërkuar dorëheqjen e kryebashkiakes dhe shkrirjen e departamentit të policisë.

Disa ditë pasi kryebashkiakja Jenny Durkan dhe shefi i policisë premtuan një moratorium mbi gazin lotësjellës, departamenti e përdori atë sërish ndaj protestuesve ditën e diel, duke shkaktuar kritika të shumta.

Protestat në Siatëll erdhën disa orë pasi George Floyd, 46-vjeçari me ngjyrë i vrarë nga një oficer policie, u përcoll në banesën e fundit në qytetin e tij të lindjes në Hjuston të Teksasit.

Ceremonia mortore u bë pas dy javë protestash të nxitura nga pamjet kur Floyd, i prangosur, mbahej pa lëvizur nga agjenti që i kishte vendosur një këmbë në qafë.

Agjenti Derek Chauvin, 44 vjeç, është akuzuar me vrasje të shkallës së dytë, ndërsa 3 kolegët e tij për ndihma dhe bashkëfajësi në vrasje. Ata u shkarkuan nga detyra një ditë pas incidentit.

Fjalët e fundit të Floyd, “Nuk marr dot frymë”, u kthyen në një parullë për disa qindra mijëra protestuesit në mbarë globin, të cilët mbushën rrugët për të kërkuar drejtësi për 46-vjeçarin.