Trump: Fonde për rajonet e policisë që reformohen, më shumë kontrolle për policët e rinj

Presidenti amerikan, Donald Trump, është akuzuar se me retorikën e tij i ka nxitur edhe më shumë protestat kundër dhunës së policisë dhe barazisë racore.

Teksa protestuesit përplaseshin me policinë, pas vdekjes së George Floyd gjatë një arrestimi të dhunshëm, Trump u bëri thirrje forcave të rendit që të ndalonin plaçkitjet e dyqaneve, që ndodhnin gjatë protestave, dhe të kërkonin ndihmën e ushtrisë.

Pas kritikave, Trump ka miratuar një ligj të ri që premton reforma të radhëve të policisë.

Kur bëri paraqitjen e ligjit, Trump e nisi fjalimin duke shprehur ngushëllimet e tij për familjet e viktimave të dhunës policore. Ai premtoi drejtësi dhe i garantoi se vdekja e tyre nuk do të shkojë kot.

Megjithatë, Trump nuk vonoi të përsërisë thirrjet për të forcuar rendin ligjor duke shtuar se ndëshkimet ndaj plaçkitësve duhet të ashpërsohen.

Reforma e re do të bëjë që policia ta kontrollojë më me kujdes të shkuarën dhe gjendjen psikologjike të personave që punëson në polici.

Propozimi i Trump ofron edhe fonde shtesë për rajonet e policisë që do të ndalojnë kapjen e të dyshuarve duke u bllokuar frymëmarrjen në qafë, siç ndodhi me Floyd, përveç rasteve kur jeta e policit është në rrezik, si dhe për rajone policie që marrin certifikime të pavarura nga palë të treta në lidhje me proceset e trajnimit.