Subvencion për grurin, qeveria zgjeron skemën edhe për peshkimin dhe bletarinë

5 muaj pas nisjes së konfliktit Rusi-Ukrainë dhe 1 vit pas rritjes së çmimit të miellit, qeveria ka vendosur të mbështetë prodhimin vendas të grurit.

Të gjithë fermerët të cilët mbjellin një sipërfaqe më të madhe se 1 hektarë me grurë do të përfitojnë 30 mijë lekë për hektarë.

Aplikantët duhet të paraqesin një dokument që vërteton pronësinë e tokës, aktin e marrjes në pronësi të saj apo kontratën e qirasë, të jenë të pajisur me nipt dhe të kenë fatura të fiskalizuara për blerjen e plehrave kimike.

Subvencion do të përfitojë edhe sektori i peshkimit. Kjo industri do të marrë mbështetje 40 lekë për çdo litër të karburantit që përdor periudhën korrik dhjetor të këtij viti.

Edhe bletaria do të përfitojë 1 mijë lekë për çdo zgjua nëse ferma ka më shumë se 50 të tilla.

Edhe për këto dy sektorë kush është pajisja me nipt dhe mbajtja e faturave që vërtetojnë ushtrimin e aktivitetit për të cilin përfitojnë ndihmën.

Vendimi i qeverisë u miratua në fillim të muajit, ndërsa pritet që gjatë shtatorit Këshilli i Ministrave të detajojë edhe rritjen e subvencionit të naftës për të gjithë fermerët.

LEXONI GJITHASHTU:

• 30 mijë lekë për çdo hektar me grurë, Rama: Aplikimet nga 1 në 23 shtator