‘Mafia jashtë shtetit’. Bullgari, protestuesit kërkojnë dorëheqjen e Borissov

Disa mijëra protestues në Bullgari, disa prej të cilëve bërtisnin “Mafia jashtë shtetit”, mbushën të shtunën rrugët në kryeqytetin Sofie.

Ata protestuan kundër korrupsionit dhe kërkuan dorëheqjen e kryeministrit Boyko Borissov, qeverisë së tij dhe prokurorit të përgjithshëm.

Protestat vijnë pak kohë pasi oficerë të sigurisë bastisën zyrën e presidentit Rumen Radev, një zë kritik sa i takon korrupsionit në radhët e qeverisë, duke arrestuar dy këshilltarë të tij.

Kritikët thonë se bastisja dhe arrestimet, të organizuara nga kryeprokurori Ivan Geshev, ngrenë pyetje mbi rolin e tij që është bërë shumë politik.

Prokurorët deklaruan se operacionet ishin pjesë e dy hetimeve të ndryshme për konflikt interesi dhe zbulim të sekreteve shtetërore.

Ndërkohë, protestuesit që bërtisnin “Mafia jashtë shtetit” dhe “Dorëheqje” e akuzojnë Borissov dhe numrin 1 të organit të akuzës se qëllimisht po vonojnë hetimet mbi lidhjet e kreut të qeverisë me oligarkët.

Organi që mbikëqyr qeverisjen, Transparency International e rendit Bullgarinë si vendin më të korruptuar të 27 vendeve anëtare të BE-së.