SHBA, atentat gjyqtares federale; vritet djali dhe plagoset bashkëshorti

Djali i një gjyqtareje federale në Nju Xhersi të Shteteve të Bashkuara mbeti i vrarë në një atentat të kryer në shtëpinë e familjes.

Autoritetet amerikane deklaruan se vetë gjyqtarja Esther Salas i kishte shpëtuar atentatit, që u krye nga një person i veshur si shpërndarës pakosh i kompanisë FedEx, i cili është ende në arrati.

Motivet e atentatit mbeten të paqarta. Një zyrtar vendas dhe mik i familjes tha se gjyqtarja Salas kishte marrë kërcënime të shumta në të kaluarën për shkak të detyrës.

Ndërkohë, FBI ka deklaruar se ka nisur hetimin e ngjarjes dhe i ka bërë thirrje kujtdo që ka informacione t’i përcjellë ato tek autoritetet.

Burime zyrtare të cituara nga mediat amerikane deklarojnë se djali 20-vjeçar i gjyqtares Salas hapi derën e shtëpisë kur trokiti i dyshuari dhe u qëllua prej tij.

Më pas u sulmua edhe bashkëshorti i Salas, Mark Anderl, i cili ndodhet në gjendje kritike në spital.

Hetuesit kanë deklaruar se atentati mund të ketë pasur si objektiv edhe bashkëshortin e zyrtares, që ushtron profesionin e avokatit.