Të ardhurat shtesë, realizohet vetëm gjysma e objektivit të muajit mars

Parashikimi i qeverisë për të mbledhur 30 miliardë lekë më shumë këtë vit nuk mbështetet nga treguesit tetëmujorë të të ardhurave.

Nga të dhënat e publikuara nga Ministria e Financave të ardhurat shtesë që janë mbledhur nga doganat dhe tatimet janë sa gjysma e objektivit të shpallur nga ministrja e Financave, Delina Ibrahimaj para Komisionit të Ekonomisë në muajin shtator.

Të dhënat tregojnë se të ardhurat shtesë janë 14.7 miliardë lekë dhe kontribuesi kryesor në to mbetet TVSh-ja me një rritje prej 26 për qind në krahasim me të njëjtën periudhë të vitit të kaluar.

Parashikimi i vendosur prej ministres së Financave u quajt i ekzagjeruar nga deputeti socialist, Erion Braçe. Braçe tha gjatë debatit me ministren Ibrahimaj se pengesë në realizimin e objektivave të vendosura janë pagesat e përqëndruara në katër muajt e fundit të vitit.

““Shqetësimi që kam me defiçitin, përqëndrimi në muajt e fundit të vitit nuk mendoj se do të ndihmojë. Ju keni llogaritë tuaja. Përqëndrimi i pagesave në 4 muajt e fundit të vitit nuk ndihmon”, u shpreh Braçe.

Të ardhurat në 8 muajt e parë të këtij viti janë 376 miliardë lekë, ose 16 për qind më shumë se e njëjta periudhë e vitit 2021.

Në 6 muajt e parë të këtij viti, shtesa e të ardhurave ishte 26 për qind, çka sugjeron se në muajt korrik e gusht ka rënie konsumi, sidomos të karburanteve.

LEXONI GJITHASHTU:

• Paradoksi i naftës, importi u ul, por shitja me pakicë u rrit
• Ulet çmimi i naftës dhe benzinës, vendos Bordi i Transparencës