Princi Andrew heq dorë nga funksionet publike pas skandalit seksual

Pas intervistës së dhënë së fundmi në BBC, princi Andrew është tërhequr përfundimisht nga të gjitha funksionet publike që ai mbante.

Gjatë intervistës, Andrew mohoi akuzat se ka kryer marrëdhënie seksuale me një adoleshente.

Intervista është transmetuar në orët e vona të së shtunës dhe që nga ai moment, ka pushtuar mediat në Mbretërinë e Bashkuar.

Nëpërmjet një deklarate në Facebook, Duka i Jorkut tha se për shkak të kontradiktave të cilat e ndërlidhnin atë me ish-financierin amerikan Jeffrey Epstein, ai së fundmi mori vendimin të tërhiqej në mënyrë që të mos dëmtonte më tej aktivitetet e familjes mbretërore.

“Për këtë arsye, i kam kërkuar Madhërisë së Saj nëse mund të tërhiqem nga funksionet publike në të ardhmen, dhe ajo e ka dhënë lejen e saj,” shtoi ai.

Gjithashtu, princi ka deklaruar se ka pranuar të bashkëpunojë me forcat e rendit nëse do të jetë e nevojshme.

Sipas faqes zyrtare të Princit Andrew, ai mbart disa detyra për llogari të Mbretëreshës,  që nga promovimi i rritjes ekonomike tek krijimi i vendeve të reja të punës.

Por që prej intervistës një sërë biznesesh të njohura janë bashkuar me nismën e disa universiteteve dhe grupeve bamirëse për tu distancuar prej tij.

Për muaj të tërë Andrew është përballur me pyetje për lidhjet e tij me Jeffrey Epstein.

Epstein i dha fund jetës në qelinë e tij teksa priste gjykimin për akuzat e abuzimeve seksuale.

Një nga viktimat e Epstein ka rrëfyer se ishte detyruar të kryente marrëdhënie seksuale me princin në tre raste,  akuzë të cilën princi e ka mohuar vazhdimisht.

Mbretëresha Elizabeth II ëshë shfaqur mbrëmë në një pritje por nuk ka bërë asnjë koment rreth ngjarjes.