Zjarret në Evropë shkrumbojnë mijëra hektarë pyje

Moti i nxehtë në mbarë Evropën u ka hapur probleme autoriteteve që luftojnë me flakët. Në brigjet pranë Marsejës, në jug të Francës, zjarrfikësit janë përpjekur të frenojnë zjarret që janë përhapur nga erërat e forta.

Mbi 800 hektarë janë djegur. Të martën vonë, pushuesit në kampe u urdhëruan të evakuoheshin në plazh për të shmangur prekjen nga zjarret.

 “Zjarrfikësit u kapën të papërgatitur. Gjithçka ndodhi shumë shpejt. Shikoni erën dhe tymin, flakët po përhapen me shpejtësi”, tha njw pushues.

 “Fillimisht pamë flakët në distancë të largët, më pas ato filluan të afroheshin gjithnjë e më shumë, derisa ndodheshin 50 metra nga shtëpia. Ishin 20 metra të larta”, shtoi njw tjetwr.

Në qendër të Italisë, në rajonin e Abrucos, beteja për të vënë nën kontroll zjarret vijon prej disa ditësh.

Zjarrfikësit kanë shtuar përpjekjet për të luftuar flakët që po i afrohen një zone të banuar në Akuila. Ky rast, që dyshohet të jetë i qëllimshëm, është një prej zjarreve të shumta që kanë përfshirë pyjet e Italisë, në këtë stinë të nxehtë vere.

Edhe në Rusi autoritetet thonë se zjarret kanë përfshirë rreth 60 mijë hektarë tokë. Zona autonome e Çukotkës dhe rajoni Amur, në ekstremin lindor, janë veçanërisht të prekura.

Ekologët që punojnë në këto zona për rritjen e farave thonë se dëmi është madhor.