Shpërthimi në Bejrut, presidenti premton hetim; pistat e para neglizhenca dhe mosveprimi

Presidenti i Libanit, Michel Aoun deklaroi të mërkurën se hetimi mbi shpërthimin që tronditi Bejrutin do të zbardhë tërësisht rrethanat e ngjarjes dhe rezultatet e procesit do të jenë transparente për të gjithë.

Në një fjalim televiziv përpara mbledhjes së kabinetit të tij, Aoun u bëri thirrje vendeve të tjera që të përshpejtojnë kontributin e tyre për Libanin, vend që përballet prej kohësh me një kolaps ekonomik.

“Ne jemi të vendosur të hetojmë dhe të zbulojmë sa më parë të jetë e mundur se çfarë ndodhi dhe të ndëshkojmë të gjithë personat përgjegjës”, deklaroi Aoun.

Hetimet paraprake mbi episodin e rëndë, sipas një burimi zyrtar të cituar nga agjencia “Reuters”, tregojnë se shpërthimi ka ndodhur për shkak të mosveprimit dhe neglizhencës me lëndët e rrezikshme që ndodheshin të magazinuara.

Ndërsa një burim tjetër deklaroi se, një ekip që kishte inspektuar materialet 6 muaj më parë kishte paralajmëruar se depozita mund të hidhte në erë gjithë Bejrutin nëse nuk zhvendosej.

Drejtori i portit të Bejrutit dhe ai i doganave deklaruan të mërkurën se letra të shumta u ishin dërguar institucioneve përgjegjëse, ku paralajmërohej rreziku nga materialet e rrezikshme, por asnjë veprim nuk ishte ndërmarrë.