Konfindustria-Kuvendit: Thërrit në seancë urgjente ERE-n për çmimet e energjisë

Konfindustria i kërkon Kuvendit të Shqipërisë të thërrasë në seancë urgjente dëgjimore Entin Rregullator të Energjisë/ERE, për të arsyetuar vendimin e fundit për fashën e konsumit të energjisë.

Kreu i Konfindustrisë, Gjergj Buxhuku, thekson se ERE e ka për detyrim ligjor të shpjegojë publikisht në mënyrë profesionale dhe të hollësishme, para Kuvendit të Shqipërisë, arsyet financiare, teknike dhe institucionale të sistemit energjitik, që kanë çuar në rritjen e çmimit të energjisë elektrike.

“ERE duhet të arsyetojë hollësisht lidhur me kostot e larta financiare të menaxhimit të operatorëve publikë KESH, OST, OSHEE; kostot shtesë të shitblerjeve e energjisë elektrike nëpërmjet ndërmjetësve; vazhdimin në nivele të larta të humbjeve në sistem me mbi 21% të sasisë së përgjithshme; zbatimin e kontratave koncesionare të energjisë së prodhuar nga HEC- et private; masat e marra nga OSHEE për moslejimin e abuzimit me matjet e konsumit me fasha etj., si faktorë përcaktues të vendimit për rritjen e fortë të çmimit të energjisë në shtator 2022”- thuhet në njoftimin e Konfindustrisë.

Konfindustria vlerëson, se vendimi i ERE për rritjen me afër 5 herë e çmimit të energjisë elektrike për konsum familjar mbi fashën 800 lekë/muaj do të jetë me pasoja të rënda për 90-130 mijë familje shqiptare dhe me ndikim të drejtpërdrejtë në rëndimin e klimës së biznesit dhe ekonomisë kombëtare.

“Shqipëria, edhe pse është relativisht e pavarur në prodhimin e energjisë elektrike nga tregjet ndërkombëtare dhe gazi rus, ka çmimet më të larta në rajon për biznesin dhe familjarët”- përfundon njoftimi.

LEXONI GJITHASHTU:

• Rama: Rritja e çmimeve, pengesë për ndërtimin e Teatrit Kombëtar
• Faturimi i energjisë, Eurostat: Shqipëria ka çmimet më të larta në rajon