Trump sulmon demokratët: Nëse fiton Biden, Shtetet e Bashkuara kthehen në Venezuelë

Presidenti amerikan, Donald Trump, duke u ndalur në Uiskonsin në kuadër të fushatës së tij, u shpreh i bindur për fitoren në zgjedhjet e nëntorit.

Ndërsa akuzoi demokratët për ndërhyrje në fushatë, Trump theksoi se 4-vjeçari i ardhshëm i përket atij.

“Në 78 ditë ne do ta ndalim të majtën radikale, do të fitojmë në shtetin e Uiskonsinit dhe do të sigurojmë një tjetër 4-vjeçar. Dhe pas kësaj do të kërkojmë 4 vite të tjera, sepse ata kanë përgjuar fushatën time, ndaj duhet të ribëjmë 4 vitet që na takojnë”, tha presidenti i SHBA.

Trump u shpreh se Joe Biden është alternativa më e keqe për SHBA ndërsa shtoi se nëse ky i fundit fiton zgjedhjet vendi do të kthehet në Venezuelë.

“Këto janë zgjedhjet më të rrezikshme që kemi mbajtur ndonjëherë. Më të rrezikshmet sepse nuk mendoj se mund të ketë kthim pas. Nuk ka kthim pas. Vendi do të jetë një tjetër Venezuelë.

E kam thënë këtë dikur me të butë, por tani e them fuqishëm pasi është një ideologji e ngjashme. Do të jetë një Venezuelë e vërtetë nëse ata fitojnë”, tha Donald Trump.

Trump shkoi edhe më tej duke e quajtur Biden “Xho, i përgjumuri” dhe shtoi se një administratë eventuale e udhëhequr prej tij dhe Kamala Harris do të hiqte nenin për armëmbajtjen, duke u dhënë sipas tij kriminelëve mundësinë për të kontrolluar rrugët.