Apeli i Papa Françeskut: Vaksina kundër COVID-19, jo ekskluzivitet i të pasurve

Në fjalimin e tij të së mërkurës, Papa Françesku u bëri thirrje vendeve të pasura që të mos e përvetësojnë vaksinën kundër COVID-19.

Ati i shenjtë u shpreh se do të ishte një skandal nëse e gjithë asistenca ekonomike që po jepet për të luftuar coronavirusin do të shkonte në duart e subjekteve që nuk kontribuojnë në gjithëpërfshirjen e njerëzve të përjashtuar nga shoqëria, apo në mbështetjen e të dobëtëve dhe për të mirën e përbashkët.

“Do të ishte e trishtueshme nëse për vaksinën do t’u jepej prioritet të pasurve. Do të ishte gjithashtu e trishtueshme nëse vaksina do të kthehej në pronë të këtij apo atij shteti dhe nuk do të ishte universale”, tha Ati i Shenjtë.

Numri i të prekurve nga COVID-19 në rang global arriti të martën në 21 milionë e 756 mijë e 357 raste, ndërsa bilanci i vdekjeve, sipas të dhënave të OBSH-së, preku kuotën e 771 mijë e 645 viktimave.