Berlin, policia klasifikon si sulm terrorist aksidentet në autostradë

Një seri aksidentesh rrugore të verifikuara të martën në autostradën e Berlinit ishin një sulm ekstremist islamik. 

Në këtë përfundim kanë arritur prokurorët gjermanë, pas hetimeve të kryera.

Ngjarja ndodhi kur një 30-vjeçar iraken u përplas me automjetin e tij ndaj disa makinave të tjera në autostradën A100, në jug të qytetit.

Rruga është arterja kryesore që çon drejt Berlinit dhe qëndroi e mbyllur për disa orë, duke shkaktuar kaos në trafik.

Në total 6 persona mbetën të plagosur, 3 prej të cilëve rëndë.

Në një postim në Twitter, policia e Berlinit falënderoi drejtuesit e mjeteve për durimin dhe shprehu shpresën që të gjithë të jenë kthyer në gjendje të mirë në shtëpitë e tyre.

Autostrada u bllokua sërish mëngjesin e së mërkurës, kur u kryen hetimet në terren.

Ndërkohë, agresori u arrestua në vendngjarje.

Që prej vitit 2013 numri i islamikëve të konsideruar të rrezikshëm në Gjermani është 5-fishuar në 680 të dyshuar, sipas të dhënave të shërbimeve të sigurisë.