‘Përplasje’ Meloni-Salvini, kryeministrja shpalos planin për emigrantët

Sikurse e dimë, politikat migratore janë zemra e programit politik të koalicionit të djathtë. Teksa iu drejtua Parlamentit, Giorgia Meloni u zotua se do të ndalë nisjet ilegale dhe trafikun njerëzor duke rikthyer operacionin e koduar “Sofia” dhe duke punuar me institucionet e BE-së.

Ajo tha: “Ne duam të parandalojmë që trafikantët të zgjedhin se kush duhet të hyjë në Itali”. Por pavarësisht faktit se ajo është gati të punojë me institucionet e BE-së, duket se dy nga ministrat e saj kanë nisur nga puna për implementimin e qasjes së ashpër ndaj emigrantëve.

Njëri është ministri i Brendshëm Piantedozi, që ka kërcënuar se do të bllokojë dy varkat e shpëtimit që mbajnë disa qindra emigrantë; njëra është “Oshën Viking” dhe tjetra “Hjumaniti”. Sipas ministrit, ato nuk zbatuan rregullat. Madje, ai ka thirrur një takim për ta diskutuar çështjen me Komitetin e Sigurisë Kombëtare.

Tjetri është Matteo Salvini, lideri i Ligës, që është emëruar ministër i Infrastrukturës. Ai do të jetë përgjegjës për mbikëqyrjen e porteve të vendit dhe ka kërcënuar që tani se do t’i mbyllë ato për të parandaluar hyrjen e emigrantëve në vend. Ai ka zhvilluar edhe një takim me krerët e Rojës Bregdetare italiane.

Disa analistë kanë sugjeruar se kjo është fushata e fundit e Salvinit për të ndihmuar partinë e tij të sigurojë më shumë mbështetje dhe votat që ka humbur ndër vite”.

LEXONI GJITHASHTU:

• ‘Kurrë me fashizmin’, Meloni në Parlament: Italia, partner i besueshëm i Perëndimit
• Meloni: Qeveria italiane nuk do të pranojë të shantazhohet nga Putin