Pandemia rriti informalitetin, 40% e parave jashtë bankave

Pasiguria ekonomike e krijuar nga pandemia COVID-19 ka shtuar qarkullimin e parave jashtë sistemit bankat. Referuar të dhënave nga Banka e Shqipërisë, 40% e parave janë jashtë bankave, ndërsa krahasuar me një vit më parë, qarkullimi jashtë sistemit është rritur me 14.5%.

Sipas Bankës së Shqipërisë, sasia e parasë jashtë sistemit bankar arrin vlerën e 2.6 miliardë euro.  

Gjithashtu, qarkullimi i parave jashtë bankave ka pasur tendencë rritëse edhe gjatë muajve të verës, për shkak se shumica e shqiptarëve i kaluan pushimet në vend, çka ka sjellë më shumë tërheqje parash nga bankat.

Një faktor tjetër mund të ketë qenë edhe shtyrja e kësteve të kredisë, që ka rritur likuiditetin e lirë për bizneset e familjes. Pjesërisht, kjo mund të ketë ndikuar në flukse në rënie hyrëse të parasë brenda sistemit bankar. Rritja e qarkullimit të parasë jashtë bankave shihet si një sinjal për rritjen e informalitetit.

Rreziku gjithashtu është edhe për evazionin fiskal, pasi në këtë formë mbizotëron ekonomia ‘cash’. Duket se pandemia COVID-19, përveç rritjes së papunësisë dhe uljes së të ardhurave do të sjellë probleme të mëdha për formalizimin e ekonomisë.