Musk rikthen Trump në Twitter

Pronari i ri i Twitter, Elon Musk ka deklaruar se profili i Donald Trump në rrjetin social është riaktivizuar, pas një sondazhi në të cilin një shumicë e vogël përdoruesish mbështeti lëvizjen.

“Njerëzit folën”, ishte reagimi i Musk, sipas të cilit 51.8% e mbi 15 milionë përdoruesve të Tëitter votuan pro riaktivizimit.

Por ish-presidenti amerikan mund të mos kthehet në platformën online, pasi më herët ka deklaruar se, nuk sheh ndonjë arsye për ta bërë këtë.

Profili i tij u pezullua në 2021-shin për shkak të rrezikut të nxitjes së dhunës.

Menaxherët e mëparshëm të Twitter vepruan pak ditë pasi mbështetësit e Trump bastisën godinën e Capitol Hill më 6 janar.

Disa qindra protestues hynë në kompleks teksa Kongresi amerikan përpiqej të certifikonte fitoren e Joe Biden në zgjedhjet presidenciale. Dhuna e nxitur çoi në vdekjen e 4 civilëve dhe një oficeri policie.

Menjëherë pas kryengritjes, profilet e Donald Trump në Facebook, Instagram dhe YouTube,

të cilat kishin dhjetëra milionë ndjekës, u pezulluan gjithashtu.

Disa muaj më vonë, ish-kreu i shtetit publikoi rrjetin e tij social, Truth Social. Ndërsa më herët gjatë javës, ai njoftoi se do të garojë sërish për president në 2024-n.

Sa i takon Musk, ai mori nën kontroll Twitter-in në tetor, në kuadër të një marrëveshjeje prej 44 miliardë dollarësh.

LEXONI GJITHASHTU: 

• Mustafaraj: Protesta do jetë e vështirë për t’u organizuar, Tirana do blindohet
• Elon Musk, 92 miliardë dollarë minus që nga marrja e Twitter