Greqia rimbyll shkollat, pezullohet mësimi në 5 institucione

Autoritetet arsimore në Greqi njoftuan të enjten mbylljen e përkohshme të 5 shkollave për shkak të rasteve të reja me koronavirus, të konstatuara tre ditë nga rihapja e tyre.

Tre prej shkollave iu kërkua të qëndrojnë të mbyllura të paktën deri më 18 shtator, pasi punonjësit e saj dolën të infektuar, ndërsa 2 shkollat e mbetura do të qëndrojnë të mbyllura deri më 27 shtator.

Krahas kësaj, një zyrtar i arsimit në Lesvos tha se, të gjitha shkollat në ishull do të qëndrojnë të mbyllura të paktën deri më 21 shtator, për shkak të rritjes së infektimeve në ishull.

Bëhet fjalë për herën e dytë që ishulli shtyn rihapjen e institucioneve arsimore, që ishte planifikuar të ndodhte të mërkurën.

Ekspertë nga bordi për shëndetin publik të Greqisë paralajmëruan se infektimet mund të arrijnë deri në 1 mijë raste në ditë dhe se sistemi shëndetësor i vendit mund të hyjë në kolaps nëse qytetarët nuk veprojnë me kujdes apo nuk zbatojnë masat.

Ndërsa zëdhënësi i qeverisë greke, Stelios Petsas konfirmoi një ditë më parë mundësinë e një bllokade të dytë në disa qytete.