Johnson paralajmëron britanikët: Vala e dytë e pashmangshme

Kryeministri britanik Boris Johnson ka deklaruar se vala e dytë e koronavirusit është e pashmangshme për Mbretërinë e Bashkuar.

Për këtë arsye, ka thënë ai gjatë një vizite në një kantier ndërtimi, qeveria ndërmori masa të reja, mes të cilave ajo që njihet si rregulli i gjashtës, që parashikon grumbullime njerëzish në ambjente të brendshme dhe të jashtme deri në 6 persona.

“Natyrisht, ne po ndjekim me vëmendje përhapjen e pandemisë, që në ditët e fundit ka evoluar dhe nuk mund të vihet në dyshim. Po e shohim atë në Francë, po e shohim në Spanjë dhe në të gjithë Evropën. Ndaj, kam frikë, se është e pashmangshme edhe për vendin tonë”, ka deklaruar Johnson.

Kreu i ekzekutivit britanik është shprehur se nuk e dëshiron një bllokadë të dytë dhe se dëshiron t’i mbajë subjektet publike dhe private hapur.

Në këtë aspekt, ai ka vlerësuar me nota pozitive rihapjen e shkollave dhe ka theksuar se e hapur duhet të mbetet edhe ekonomia dhe bizneset e vendit.