Protesta në Bjellorusi, opozita manifeston kundër betimit të Lukashenkos

Forcat bjelloruse të sigurisë arrestuan persona të shumtë dhe qëlluan gaz lotësjellës për të shpërndarë turmat e njerëzve të mbledhur në rrugët e Minskut për të protestuar kundër betimit të presidentit Alexander Lukashnko.

Duke injoruar thirrjet për t’i dhënë fund pushtetit 26-vjeçar, Lukashenko u betua për mandatin e tij të gjashtë të siguruar pas zgjedhjeve të 9 gushtit, që opozita dhe faktori ndërkombëtar i cilësoi të manipuluara.

Opozita e ish-republikës sovjetike, që po përjeton protesta prej më shumë se 6 javësh, kërkon dorëheqjen e presidentit dhe e ka cilësuar betimin e tij ilegjitim.

“I ashtuquajturi inaugurim është një farsë. Në të vërtetë, Lukashenko sapo dha dorëheqjen. Kjo do të thotë se urdhrat e tij për ushtrinë dhe forcat e sigurisë nuk janë më legjitimë dhe s’mund të ekzekutohen. Unë, Sviatlana Tsikanovskaya, jam e vetmja lidere e zgjedhur nga populli bjellorus. Detyra jonë tani është të ndërtojmë një Bjellorusi të re”, ka deklaruar Sviatlana Tsikhanovskaya, lidere e opozitës, Bjellorusi.

Normalisht, ceremonia do të ishte mbajtur si një event i rëndësishëm shtetëror, por ndryshe nga herët e tjera kaloi pa paralajmërim.