Skllavëria moderne, ONP kritika vendeve të pasura për indiferencën

Një në 150 persona në botë janë skllevër të kohëve moderne, ka bërë të ditur Organizata Ndërkombëtare për Punën. Thuajse gjysma e tyre janë të përfshirë në punë të detyruar dhe 1 në 8 prej tyre janë fëmijë.

Gratë janë të prirura të angazhohen në punë shtëpie, ndërsa burrat në ndërtim. Shfrytëzimi seksual përfaqëson më shumë se gjysmën e të gjitha formave të punës së detyruar.

Shpesh herë të bllokuar nga borxhet e mëdha, të izoluar dhe subjekt i dhunës fizike dhe psikologjike, t’i shpëtosh punës së detyruar është e vështirë, sidomos për emigrantët.

Më shumë se gjysma e punës së detyruar ndodh në vendet me të ardhura të mesme e të larta.

Një formë më pak e njohur e skllavërisë moderne është martesa e detyruar. Vajzat në vendet e varfra janë më të rrezikuarat, me dy të tretat e viktimave që detyrohen të martohen janë femra dhe mes tyre, tre të katërtat janë nën 15 vjeç.

Organizata Ndërkombëtare e Punës thotë se mjetet për t’i dhënë fund skllavërisë moderne ekzistojnë. Por, konfliktet, pandemia dhe varfëria ngadalësojnë procesin.

Gjithashtu, zakonet patriarkale dhe stigmatizimi i marrëdhënieve seksuale bëjnë që fundi i trafikimit për qëllime të tilla dhe për martesat e detyruara të jetë larg.

Por, si në rastin e martesave ashtu edhe në atë të punës së detyruar, autoritetet kanë fuqinë të përforcojnë ligjet. Kjo vlen veçanërisht në rastet e punës së imponuar nga shteti.

Kombet e Bashkuara janë zotuar t’i japin fund të gjitha formave të skllavërisë moderne brenda 2030-s.

LEXONI GJITHASHTU:

• Rreth 8 milionë fëmijë rrezikojnë të vdesin nga kequshqyerja, sipas UNICEF
• UNICEF: Mijëra fëmijëve të traumatizuar në Ukrainë u nevojitet ndihmë