Përplasje ushtarake midis Armenisë dhe Azerbajxhanit, raportohet për viktima

Të dielën u regjistruan përplasje ushtarake midis forcave azere dhe atyre armene. Tensionet në rritje midis dy vendeve erdhën si rezultat i rajonit me shumicë armene të Nagorno-Karabah, të cilët pas ndarjes së Bashkimit Sovjetik në vitin 1991, shpallën autonominë nga Azerbajxhani.

Pavarësisht arritjes së një armëpushimi në vitin 1994, të dy shtetet kanë akuzuar njëri-tjetrin për sulme në kufi dhe pranë rajonit të Nagorno-Karabah.

Ministri i Mbrojtjes së Armenisë deklaroi se trupat armene shkatërruan tri tanke dhe dy helikopterë azerë, në përgjigje të sulmeve të kryera ndaj popullsisë civile në Kryeqytetin e Provincës Autonome, Stepanakert.

Në një postim në Twitter, kryeministri armen Nikol Pashinyan shkroi: “Mbështesim ushtrinë tonë për mbrojtjen e mëmëdheut ndaj pushtimit dhe agresionit azer.” 

Azerbaijan has launched a missile & aerial attack against #Artsakh. Peaceful settlements including #Stepanakert have been attacked. Armenian side has shot down 2 helicopters & 3 UAVs, destroyed 3 tanks. We stay strong next to our army to protect our motherland from Azeri invasion

— Nikol Pashinyan (@NikolPashinyan) September 27, 2020

Ndërkohë, nuk ka vonuar edhe kundërpërgjigja e Azerbajxhanit, me anë të këshilltarit të presidentit, Hikmet Hajiev, i cili u shpreh se forcat azere kishin kontroll të plotë në front ndaj armikut dhe se ushtria armene kishte sulmuar pozicionet ushtarake dhe civile në kufi pa provokim.

Sipas ministrit të Mbrojtjes së Azerbaixhanit, nga këto sulme kishin mbetur të vrarë dhjetëra persona dhe se kundërpërgjigja ushtarake ishte e nevojshme për të garantuar sigurinë e popullatës civile që banon përgjatë kufirit.