PPE: Zbatoni 5 qershorin, ndryshimet e njëanëshme janë kundër rekomandimeve të OSBE/ODIHR

Partia Popullore Europiane, grupimi më i madh politik që drejton sot BE ka dalë me një deklaratë në lidhje me zhvillimet e fundit politike në Shqipëri, pas diskutimeve në Asamblenë Politike të PPE.

PPE thekson se zgjedhjet e lira dhe të ndershme të 2021 do të jenë parakusht për integrimin e Shqipërisë në BE.

Po ashtu bëhet thirrje për zbatimin e ndryshimeve në Kodin Zgjedhor siç është rënë dakord mes palëve politike në “5 qershor”, pasi ndryshimet e njëanëshme, siç theksohet në rezolutë janë kundër rekomandimeve të OSBE/ODIHR.

“PPE mbështet plotësisht udhërrëfyesin e Shqipërisë drejt integrimit në BE, duke përfshirë zgjedhjet e lira dhe të ndershme si parakusht themelor. Reforma zgjedhore e 5 qershorit u miratua në mënyrë konsensuale dhe u mbështet ndërkombëtarisht dhe duhet të zbatohet siç është rënë dakord. Ndryshimet e njëanëshme në këtë fazë, janë kundër rekomandimeve të OSBE/ODIHR si dhe kundër vendimit të Këshillit të BE për hapjen e negociatave të pranimit. PPE nxit të hiqet dorë nga çdo ndryshim i njëanshëm dhe të respektohet marrëveshja konsensuale sipas zotimeve”, thuhej në deklaratë.

Lexoni gjithashtu:

Ambasadori i BE-së, Soreca: Të respektohet marrëveshja e 5 qershorit

Reforma zgjedhore, Yuri Kim: Respektoni ‘5 qershorin’, është çështje nderi