Ekonomia u tkurr me 10.2%, karantina goditi rëndë tregtinë, turizmin dhe konsumin

Efekti i pandemisë, në kulmin e saj, gjatë tremujorit të dytë të vitit, e tkurri ekonominë me 10.2%. Mbyllja e aktivitetit tregtar dhe humbja e afro 60 mijë vendeve të punës ishin faktorët që i dhanë goditjen e fortë Prodhimit të Brendshëm Bruto. Sipas INSTAT, tregtia, transporti, turizmi dhe aktivitetet profesionale ishin sektorët e prekur më rëndë, ndërsa bujqësia dhe tregu i pasurive të paluajtshme performuan me shifra pozitive.

Nga prilli në qershor konsumi final ra me 7,57%, ndikuar nga pasiguritë e individëve për të bërë shpenzime, edhe pse qeveria miratoi dy paketa për mbështetjen e bizneseve dhe qytetarëve. Projeksionet ekonomike për këtë vit duken të jenë pesimiste, pasi në raportin e përditësuar për Shqipërinë, FMN parashikon tkurrje me 7.5 për qind.

Në datën 9 mars Shqipëria shënoi rastet e para me Covid-19, dhe si përgjigje të parë qeveria anuloi të gjitha ngjarjet sportive, kulturore dhe evente të mëdha publike. Të gjitha baret, restorantet dhe klubet e natës u mbyllën, sikurse edhe palestrat, parqet e deri te kufijtë tokësore. Masat drastike dhe hedhja në qarkullim e 45 mld lekëve  si mbështetje sociale nuk arritën të reflektonin me shifra pozitive.