Stoltenberg në Greqi. Bind Athinën për uljen e tensioneve

Sekretari i përgjithshëm i NATO-s, Jens Stoltenberg duket se ia ka arritur qëllimit për të qetësuar krizën greko-turke, e krijuar për shkak të pretendimeve territoriale dhe kërkimeve për hidrokarbure në Lindje të Mesdheut.

Pas vizitës së tij në Greqi ditën e martë, kryeministri grek Qirjakos Micotaqis deklaroi se Athina mirëpret lëvizjet e fundit të Turqisë për çtensionimin e situatës, por shtoi se Ankaraja duhet të tregojë një angazhim më të fortë për të përmirësuar marrëdhëniet.

Javën e kaluar, Stoltenberg njoftoi krijimin e një mekanizmi për të shmangur përplasjet aksidentale në lindje të Mesdheut, si pjesë e përpjekjeve për uljen e tensioneve mes dy vendeve, aleate në NATO.

Mekanizmi në fjalë përfshin ngritjen e një linje ndërlidhëse për të shmangur incidentet në det dhe në ajër, pas frikës për një përplasjeje mes Athinës dhe Ankarasë në gusht.

Stoltenberg, që ditën e hënë u takua me presidentin turk Erdoan, deklaroi se beson që mekanizmi do të ndihmojë në krijimin e hapësirave për një zgjidhje diplomatike.